RANGITĀNE TANGATA RAU

UPOKO KI RUNGA!

Nā Jeremy Tātere MacLeod

Rangitāne! Upoko ki runga!
Rangitāne! Upoko ki runga!
Kia mau ki tō mana tuku iho!
Puritia kia ita, ita mau tonu ē! I ā haha!
Me tahu te ahi kia whitawhita ai ngā ngārehu,
Kia kongange, kia pūkauri! I ā haha!
Tēnei a Rangitāne tini mano, e haere nei! Ana!
Tini mano e haere nei, ana! Ana! Ana, hī!

Oriori mo Whakaewa-i-te-rangi

Uiui noa au e hine ko wai tō ingoa
I kawea ai koe e ō matua ki te wai tū ai
Māku e tapa atu i te ingoa ō tō tupuna
Whakaewa-i-te-rangi e hine.
Noho mai e hine i roto i te whare Taiwhetuki
I te whare nō tuarangi ka patua e Tane
Hei topetope i ana toko,
I a Toko-huri-nuku, i a Toko-huri-rangi,
I a Rakau-tuke, i a Rakau-koki, nga toko e hine.
I tokona ai te rangi runga nei.
Rere te maramara o Te Awhiorangi,
Ko te toki tēnā i topetopea ai ngā ngaru.
Ki te tangata nā wai rā e
Mau e ki atu, nā te Kahui Pou.
Na Pou-titi, nā Pou-tahae na Pou-korero
Na Kahu-taringa i tiki ki roto o Wharekura e hine e

NAU MAI E TAMA

Nāu mai e tama, kia mihi atu au;
I haramai rā koe i te kunenga mai o te tangata
I roto i te āhuru mōwai, ka taka te pae o Huaki-pouri;
Ko te whare hangahanga tēnā a Tane-nui-a-rangi
I te one i kura-waka, i tātāia ai te Puhi-ariki,
Te Hiringa-matua, te Hiringa-tipua, te Hiringa-tawhito-rangi;
Ka karapinepine te pūtoto ki roto te whare wahiawa
Ka whakawhetū tama i a ia,
Ka riro mai a Rua-i-te-pukenga, a Rua-i-te horahora;
Ka hōkai tama i a ia, koia hōkai Rauru-nui,
Hōkai Rauru-whiwhia, hōkai Rauru maruaitu,
Ka mārō tama i te ara namunamu ki taiao;
Ka kōkiri tama i a ia ki te aotūroa,
E tama, ē ī!

Haramai, e tama, whakaputa i a koe
Ki runga te tūranga mātua
Mārama te ata i Uru-rangi,
Mārama te ata i Taketake-nui-o-rangi,
Ka whakawhenua ngā Hiringa i konei, e tama!
Haramai, e mau tō ringa ki te kete tuauri,
Ki te kete tuatea, ki te kete aronui,
I pikitia e Tane-nui-a-rangi i te ara tauwhāiti,
I te Pu-motomoto o Tikitiki-o-rangi.
I karangatia e Tane-nui-a-rangi ki a Huru-tea-a-rangi,
I noho i a Tonganui-kaea, nāna ko Parawera-nui,
Ka noho i a Tawhiri-matea, ka tukua mai tana whānau,
Titi-parauri, Titi-matanga-nui, Titi-mata-kaka;
Ka tangi mai te hau mapu, ka tangi mai te rorohau,
Ka eketia ngā rangi ngahuru mā rua i konei,
E tama ē ī!

Haramai, e tama, i te ara ka takoto i a Tane-matua;
Kia whakangungua koe ngā rākau matarua nā Tu-mata-uenga;
Ko ngā rākau tēnā i patua ai Tino o Whiro i Te Paerangi
Ka heke i Taheke-roa, koia e kume nei ki te pō tangotango,
Ki te pō whāwhā o Whakarua-i-moko, e ngunguru rā I Rarohenga,
Ka waiho nei hei hoariri mō Tini o Tane-matua I te aotūroa.
I konei, e tama, ka whakamau atu ki te Pito-uru-rangi,
Kia Tu-mata-kaka, kia Tu-mata-tawera,
Kia Tu-mata-huki, kia Tu-mata-rauwiri,
Hei whakamau i te pona whakahoro kai nā Hine-ti-tama,
Ka waiho nei hei tohu ki a Tane-matua,
Ka whakaoti te pūmanawa o Tane i konei,
E tama, ē ī!