Tihei Rangitāne!

E koro mā, e kui mā i te pō, moe mai rā ki roto i te Wāhi Ngaro. Tēnei rā ā koutou mokopuna te tangi atu nei, te haku atu nei, te mōteatea atu nei ki a koutou. Tēnei rā mātau te whāriki atu nei i ngā kōrero, i ngā whakapapa, i ngā mahere whenua, me ngā whakaahua e pā ana ki tō tātau Rangitānetanga, e pā ana hoki ki ā tātau kerēme ki te Karauna. Ka tāia ēnei āhuatanga ki ēnei pukapuka e rima nei, hei titiro, hei akoako, hei tuku iho mā ā koutou mokopuna ki roto i ngā whakatipuranga kei te heke mai. E rārangi mai nei ko ngā kerēme a Rangitāne, e whakaatu ana i ngā hara i pā mai ki a tāua me ngā mamae hoki.

Kei konei hoki ngā kōrero tautoko a ō mātau roia e whakamārama haere ana i ngā kerēme nei, ngā whakahokinga kōrero a te Karauna, me te whakawhāititanga mai o ngā take matua i kitea e Te Rōpū Whakamana i te Tiriti o Waitangi. Kei konei ā tāua kōrero tuku iho, whakapapa hoki me ngā kōrero a ngā kaumātua mō ō rātau ohinga me ā rātau mahinga nui. Hei muri mai, ko ngā kōrero a ngā tohunga e pā ana ki te taiao, ki te matauranga, ki ngā marae me ngā hapū o Rangitāne, e pā ana hoki ki te pēhinga o te ingoa o Rangitāne me tōna aranga ake. Ka mutu, kei te pukapuka whakamutunga ko ngā kōrero mō ngā honohononga o Rangitāne ki ōna hapū, ki ōna whenua, ki ōna wāhi tapu. He taonga ēnei kōrero ka tukuna ki ngā whakatipuranga. E hika mā, hapaitia, puritia, tukuna hei mana motuhake mō tāua. Rangitāne, tū mai rā. Tū mai rā, Rangitāne.